Plantun de Prouvènço

Pèr coumpara dos planto d'encò nostre

Bromus lanceolatus & Myricaria germanica

Bromus lanceolatus

Poaceae Graminaceae

Noms en français : Brome lancéolé, Brome à grands épillets.

Descripcioun :
Aquéu senòbi trachis dins li tepiero seco, ermas, culturo e escoumbre pulèu en basso Prouvènço, que mounte gaire en mountagno. Sèmblo proun au senòbi-faus-òrdi, Bromus hordeaceus, pamens lis espigueto fan toujour mai que 2,5 cm (< 2,5 cm encò B. hordeaceus) e l'arèsto, di proun torso, es estacado à pu de 2 mm de la pouncho de la lemma.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 15 à 90 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Bromus
Famiho : Poaceae
Famiho classico : Graminaceae
Tribu : Triticeae
Ordre : Poales

Coulour de la flour : Verdo
Petalo : ges
Ø (o loungour) enflourejado : 10 à 15 cm
Flourido : Printèms

Sòu : Ca
Autour basso e auto : 0 à 600 m
Aparado : Noun
Mai à jun

Liò : Tepiero seco - Ermas - Escoumbre e proche dis oustau - Culturo
Estànci : Termoumediterran à Coulinen
Couroulougi : Paleoutemperado
Ref. sc. : Bromus lanceolatus Roth, 1797

Tamarisso(-d'Alemagno)

Myricaria germanica

Tamaricaceae

Noms en français : Myricaire d'Allemagne, Petit Tamaris.

Descripcioun :
La tamarisso-d'Alemagno, dóu gènre Myricaria, trachis dins li limas de ribiero majamen en Mountagno. Li grano podon èstre empourtado mai bas. Douno d'èr à uno pichoto tamarisso, pamens l'enflourejado èi mai longo e pus espèsso emé de flour pu grando. I'a dous cop mai d'estamino que de petalo. Apoundèn que li flour soun bèn mai grosso e lou boursèu peréu (> 7 mm de long).

Usanço :
Coume pèr lis àutri tamarisso, la rusco èi diuretico, astringènto, sudorifico e aperitivo. Li jóuini pousso sarien bono pèr lucha contro lou manco de plaqueto sanguino.